Mán. 18. júní 2001
Hans hátign
Flokkur Simeons
II. vann stórsigur í þingkosningunum í Búlgaríu í gær.
Hlaut um 40% atkvæða, tvisvar sinnum fleiri atkvæði en
Lýðræðisbandalagið, næst stærsti flokkurinn, sem nú fer með
völd í landinu.
Simeon II. stofnaði flokk sinn í
apríl síðastliðnum. Hefur honum verið tekið sem þjóðhetju
hvert sem hann hefur komið en andstæðingar hans ásaka hann um
að vera lýðsskrumara, sem byggi á tálsýninni einni um betri
lífskjör undir hans stjórn.
Búlgaría er mjög fátækt
land og fimmti hver maður er atvinnulaus. Hafa því háleit
markmið Simeons um skattaívilnanir, hærri laun og minna
atvinnuleysi hlotið hylli meðal almennings. Það sem er þó
einna athyglisverðast er að Simeon sjálfur er hvergi í kjöri.
Hann fær ekki að bjóða sig fram, þar sem hann hefur búið á
Spáni nær allt sitt líf. Pólitísk staða hans er því mjög
óljós, hann mun greinilega stjórna á bak við tjöldin en þegar
hann var spurður hvort hann ætlaði sér að endurreisa
konungsveldið svaraði hann því til, að önnur verkefni væru
mikilvægari og hann ætti skilið meira traust en
það.
Hvort Búlgarar megi nú búast við að Simeon
reyni að koma aftur á konungsveldi í landinu eða ekki skal
ósagt látið, um það eru menn ekki sammála. Hinsvegar er ljóst
að það yrði þá í fyrsta skipti sem konungur næði völdum með
kosningu síðan Loðvík Napóleon gerði það í Frakklandi 1852,
þegar hann tók sér keisaratign eftir tveggja ára forsetatíð.
Reyndar var þingbundinni konungsstjórn komið á á Spáni eftir
fráfall Francos fyrir aldarfjórðungi.
Simeon er
kvæntur inn í spænsku konungsfjölskylduna. Hann hefur búið
í Madrid mest allan þann tíma síðan hann flúði ásamt móður
sinni, Ioönnu drottningu, 1946. Hann er fæddur 1937 og varð
konungur eftir sviplegt andlát föður síns, Borisar III. 1943.
Hann hefur stundað viðskipti og rekið fyrirtæki og kom ekki
til Búlgaríu aftur fyrr en fyrir fimm árum síðan. Hann
fluttist svo loksins til landsins í ár og var fagnað sem
þjóðhetju. Hann fær ekki að bjóða sig fram, samkvæmt
dómsúrskurði, en hann ætlaði að bjóða sig til forseta. Simeon
II. þykir mjög virðulegur og koma vel fyrir, er kurteis og
myndarlegur.
Eftir stríð Rússa við Tyrki 1877-78
varð Búlgaría ríki. Þá var aðeins um lítið landssvæði að
ræða en afi Simeons, Ferdinand, sem tók sér konungstign 1908,
styrkti sjálfstæði ríkisins og var það nú algjörlega laust
undan Tyrkjum. Eftir fyrri heimstyrjöldina varð hann þó að
segja af sér, því Búlgarar börðust með Miðveldunum í von um að
ná undir sig Makedóníu. Sonur hans, Boris, tók við og ríkti
til dauðadags 1943. Hann tók sér einræðisvald 1938 og studdi
Þjóðverja í seinni heimstyrjöldinni, enn í von um að stækka
ríkið í vesturátt. Þrátt fyrir að berjast með Þjóðverjum vildi
hann forðast átök við Rússa. Eftir stormasaman fund við Adolf
Hitler lést hann. Hvort hjartaáfall eða eitthvað annað varð
honum að aldurtila er enn óvitað.
Simeon II. varð þar
með konungur, sex ára gamall. Í september 1944 tóku
kommúnistar völdin, eftir að Rauði herinn hafði hertekið
landið og, sem fyrr segir, var konungsveldið afnumið 1946 og
Simeon steig ekki á búlgarska grund í hálfa öld.
Nú
er það spurning hvort tími gömlu konungsættana í
Austur-Evrópu sé kominn. Fyrir ári síðan hefðu fáir spáð
Simeoni sigri, flokkur konungssinni var þá fámennur og fæstir
trúðu að persónutöfrar hans einir dygðu til að vinna
kosningar.
Í kosningum 1997 kusu 35% Albana að
endurreisa konungsveldið. Erfinginn, Leka Zog, sem býr í
Suður-Afríku, segist ekki efast um að fólkið vilji hann sem
konung. Líkur hans virðast þó litlar, hann var rekinn úr landi
eftir að hafa tekið þátt í mótmælum sem enduðu með ofbeldi og
hefur verið handtekinn í Suður-Afríku fyrir
vopnaburð.
Alexander Karadjordjevic titlar sig
„krónprinsinn af Júgóslavíu“ á nafnspjaldi sínu. Hann
hefur búið í útlegð allt sitt líf en ber von í brjósti um að
komast aftur til valda og bendir á, í viðtali við Time í
vetur, að Kostunica forseti hafi verið konungssinni og tekið
þátt í bandalagi stjórnarandstöðuflokka, sem höfðu endurreisn
konungsveldisins á stefnuskrá sinni. Möguleikar Alexanders
verða þó að teljast litlir, þó ekki væri fyrir annað en að
Júgóslavía á nóg af óleystum vandamálum sem eru mun
mikilvægari en endurreisn konungsveldisins og því ekki skrítið
að Kostunica hafi lítinn áhuga á því núna.
Michael
Rúmeníukonungur verður að teljast ólíklegastur til að
endurheimta konungstign sína. Hann var konungur 1927-30 og frá
1940 þangað til kommúnistar tóku völdin endanlega 30. desember
1947. Hinn áttræði fyrrum konungur hefur aldrei lýst yfir
áhuga á að endurreisa konungsveldið. Flokkur rúmenskra
konungssinna var lagður niður fyrir nokkrum
misserum.
Simeon sagði sjálfur í blaðaviðtali
fyrir nokkrum árum: „Útlægur konungur er frekar
aumkunarverður, oft fórnarlamb óréttlátrar meðferðar og
skotspónn brandara“. Enginn gerir grín að honum núna, honum
hefur tekist hið ómögulega - hann er orðinn einn valdamesti
maður lands síns, með lýðræðislegum hætti.
Vonandi
verður Búlgaría áfram talin til lýðræðisríkja. Því miður
hefur þjóðin ekki búið við lýðræði lengi; fyrri helming
aldarinnar var það ólýðræðislegt konungsríki og laut síðan
stjórn kommúnista í fjóra áratugi áður en það loksins varð
lýðveldi. Þar hefur hinsvegar verið óstöðugt stjórnmálaástand,
en núverandi stjórn er sú fyrsta sem líkur fjögurra ára
kjörtímabili sínu, aðrar hafa sagt af sér fyrr. Forystumenn
flokks Simeons hafa lýst því yfir að þeir muni leita samstarfs
við aðra flokka og þar komi Lýðræðisbandalagið fyrst til
greina, þar sem hinir stóru flokkarnir er Sósíalistaflokkurinn
(flokkur fyrrum kommúnista) og flokkur tyrkneska
minnihlutans.
Hlutverk Simeons er óvíst. Hann
situr ekki á þinginu en er engu að síður sá sem stjórnar á bak
við tjöldin. Hann hefur ekki svarað því hvort hann ætli að
endurreisa konungsveldið. Það verður þó að öllum líkindum ekki
strax. Vonandi mun þingræðið vera áfram við lýði í Búlgaríu.
Að einhverskonar einveldi konungs væri komið á yrði ekki
heillavænlegt fyrir þetta fátæka land. Tíminn einn mun leiða í
ljós hvað úr verður, en við skulum vona það
besta.
Heimildir: Encyclopaedia Britannica, Time
Magazine, CNN o.fl.
ÁF
<< Til baka